 ესპანეთში მოსამზადებელ შეკრებაზე მყოფმა ზესტაფონმა პირენეებზე პირველი საკონტროლო მატჩი გამართა. როგორც ადრე გაუწყეთ, გია გეგუჩაძის გუნდის პირველი მეტოქე ავსტრიული ბუნდესლიგის ბრინჯაოს პრიზიორი ვენის აუსტრია იყო. ცნობისთვის, ქვეყნის 23-გზის ჩემპიონი და 27-გზის თასის მფლობელი აუსტრია ევროპის ლიგის მიმდინარე გათამაშების ჯგუფურ რაუნდში მონაწილეობდა, მაგრამ ეს ეტაპი ვერ გადალახა. ზესტაფონელთა კლუბის პრესსამსახურის ცნობით, ავსტრიელები ჩვენს გუნდს მთავარი შემადგენლობით ეთამაშნენ. ვენელებს ერთადერთი ფეხბურთელი, ტოტენჰემის ყოფილი შუახაზელი მილენკო აჩიმოვიჩი აკლდათ. თუმცა იმერლებმაც დანაკლისით ითამაშეს - მცირე ავადმყოფობის გამო გეგუჩაძემ ძირითადი შემადგენლობის ორი ფეხბურთელი, მეკარე ზურაბ მამალაძე და მცველი გიორგი ონიანი ვერ ათამაშა. ამ ფეხბურთელების არყოფნაში, მეკარე როინ კვასხვაძესა და გუნდის ახალწვეულს, მცველ დავით მჭედლიშვილს მიეცათ თავის გამოჩენის შანსი და მათ ეს შანსი გამოიყენეს კიდეც. ახლა უშუალოდ მატჩზე ვთქვათ. შეხვედრის პირველი ტაიმი იმერელთა საგრძნობი უპირატესობით წარიმართა. მართალია ხიფათი როინ კვასხვაძის კართანაც არაერთხელ შეიქმნა, მაგრამ ისიც გამოჩნდა, რომ ზესტაფონელებს უფრო მეტი და მწვავე მომენტები შექმნეს ჰაინც ლინდნერის კართან. მატჩის ერთადერთი გოლი კი 28-ე წუთზე გავიდა. იმერელთა მთავარი მეგოლე ნიკა გელაშვილი მარცხნიდან შეიჭრა ავსტრიელთა საჯარიმოში და მახვილი კუთხიდან ბურთი კარში გადაგზავნა. 1:0. ტაიმის ბოლომდე ჩვენს გუნდს კიდევ ჰქონდა ანგარიშის გაზრდის შანსი, მაგრამ აღარაფერი შეცვლილა. შესვენებაზე, ტრადიციულად გუნდებმა შეცვლებს მიმართეს. თამაშის განახლებამდე და მეორე ნახევრის მსვლელობისას, გია გეგუჩაძემ სასტარტოს რამდენიმე ფეხბურთელი გამოიყვანა მოედნიდან. ამით კარგად ისარგებლეს ვენელებმა და უპირატესობას დაეუფლნენ. თუმცა ზესტაფონელთა მეკარე როინ კვასხვაძემ, თანაგუნდელთა დახმარებით ბოლომდე მშრალად შეძლო კარის შენახვა და იმერლებმა მინიმალურად, 1:0 მოიგეს. ზესტაფონმა აუსტრიის წინააღმდეგ ასეთი შემადგენლობით ითამაშა: რ. კვასხვაძე, მჭედლიშვილი (74. კობახიძე), ლობჟანიძე, ხიდეშელი, ელიავა, დაუშვილი (90. მაკარიანი), ძარია (59. კორღალიძე), გრიგალაშვილი (75. გორგიაშვილი), აფციაური (77. ცხადაია), დვალი (59. ბენაშვილი), გელაშვილი (67. წინამძღვრიშვილი). დაბოლოს, ზესტაფონელები მომდევნო ამხანაგურ მატჩს ესპანეთში ხვალ, 28 იანვარს, ირაკლი მოდებაძის ზაპოროჟიეს მეტალურგთან გამართავენ. |
