 საქართველოს 17-წლამდელთა ნაკრებმა ბელგიაში მეორე ამხანაგური მატჩიც ჩაატარა და იქაური თანატოლები ქალაქ ლუვიენში 5:1 გაანადგურა. შედეგი მართლაც რომ შთამბეჭდავია - ბელგიის 17-წლამდელთა ნაკრები, რომელიც ჩვენებრ ევროპის ჩემპიონატის შესარჩევი ტურნირის პლეი ოფშია გასული, ხელწამოსაკრავი გუნდი არ არის. ეს კი თავისთავად ხაზს უსვამს ჩვენი გუნდის დიდ პოტენციალს... შესრულდა გიორგი დევდარიანის დაპირებაც - მისმა ფეხბურთელებმა ბელგიელებთან მეორე დაპირისპირება წინაზე (1:1) გაცილებით მაღალ დონეზე ჩაატარეს. აღსანიშნავია, რომ პირველი ტაიმი 5:0 მოვიგეთ. გიორგი ჭანტურიამ ჰეთ-თრიკი შეასრულა, თითო გოლი კი ვაკო ყაზაიშვილისა და დავით სხირტლაძის ანგარიშზეა. მეორე ტაიმში დევდარიანმა შემადგენლობის ნახევარი შეცვალა და მასპინძლებმაც ამის მერეღა შეძლეს პრესტიჟის გოლის გატანა - ესეც, ჩვენი გუნდის სოლიდურობის კიდევ ერთი დასტური. მოკლედ, ქართველთა ბელგიური ვოიაჟი ნაყოფიერი გამოდგა, რაც ელიტრაუნდში წარმატების იმედს გვაძლევს. საქართველოს ნაკრებმა გუშინ ამ შემადგენლობით ითამაშა: ლეგაშვილი, ხარაბაძე, გაგნიძე, ტვილდიანი, დოლიძე, პარუნაშვილი, ყაზაიშვილი, ხუბუა, სხირტლაძე, ჭანტურია, კოშაძე. შეცვლაზე შევიდნენ: ტყეშელაშვილი, გაჩეჩილაძე, პაპავა, არაბული, ფარჯიკია. |
