 გუშინწინდელი პრესკონფერენციის მიწურულს საქართველოს ფეხბურთის ფედერაციის პრეზიდენტმა ზვიად სიჭინავამ კონტრაქტის ასლი გვიჩვენა, სადაც წერია, რომ ბარსელონამ გიორგი ჭანტურიასთან თანამშრომლობა ოფიციალურად გააფორმა, რაც 17 ოქტომბრიდან შევიდა ძალაში. კონტრაქტში წერია, რომ ახალგაზრდა ქართველ ფორვარდთან ესპანური გრანდი 1+3 სისტემით დებს ხელშეკრულებას. "მოხარული ვარ, ბარსელონამ უკვე ოფიციალურად რომ გააფორმა ჩემთან ურთიერთობა. თავიდანვე ცნობილი იყო, ასე რომ მოხდებოდა, მაგრამ ბუნებრივია, მაინც სასიამოვნო ფაქტია. ყველაფერს ვიღონებ იმისთვის, რომ ასეთი შანსი ხელიდან არ გავუშვა და ბარსელონას მთავარ გუნდამდე მივაღწიო. ეს კი, პირველ რიგში, ქართველი გულშემატკივრების გასახარებლად მინდა. ვოცნებობ, გოლები საქართველოს ეროვნული ნაკრებისა და ბარსელონას მაისურით გავიტანო", - თქვა ჭანტურიამ |
