 დღეს დილით "მანჩესტერ იუნაიტედი" იტალიაში გაემგზავრა, სადაც ჩემპიონთა ლიგის მერვედფინალური ეტაპის პირველ მატჩს გამართავს. წასულ ფეხბურთელთა სიაში სამწუხაროდ ვერ მოხვდნენ სერბი მცველი ნემანია ვიდიჩი და ბრაზილიელი ანდერსონი. შეგახსენებთ, რომ მარჯვენა ფეხის ნერვის გაწყვეტის გამო 28 წლის ვიდიჩს 2010 წელს არც ერთი მატჩი არ ჩაუტარებია. ასე რომ "სან სიროზე" დაცვის ხაზში რიო ფერდინანდს ან ჯონი ევანსი, ან უეს ბრაუნი შეუწყვილდებიან. ასევე ინგლისში დარჩა საყრდენი ნახევარმცველი ანდერსონი. 21 წლის ფეხბურთელი ტრამვირებული არ არის, უბრალოდ "წითელი ეშმაკების" მთავარი მწვრთნელი სერ ალექს ფერგიუსონი მას აღარ ენდობა. ამის დასტურია ისიც, რომ ახალ წელს ანდერსონმა მხოლოდ ერთი მატჩი ჩაატარა, ისიც შეცვლაზე, "ბარნლის" წინააღმდეგ. დევიდ ბექჰემის გუნდთან ვერ ითამაშებს ასევე ვეტერანი რაიან გიგზი. უელსელმა ბოლო ტურში "ასტონ ვილას" წინააღდეგ მატჩში ხელი დაიზიანა, რის გამოც 4-დან 6 კვირამდე მოედანს ჩამოცილდება. ის ასევე გამოტოვებს საპასუხო მატჩს "მილანთან" "ოლდ ტრაფორდზე" და კარლინგის თასის ფინალს "უემბლიზე" "ასტონ ვილას" წინააღმდეგ. | 
