 ოთხშაბათს, ჩემპიონთა ლიგის მე-2 ტურში, "რეალი" "მარსელს" უმასპინძლებს. ფრანგული კლუბის ესპანელი შემტევისთვის, ფერნანდო მორიენტესისთვის ეს შეხვედრა გამორჩეული იქნება - იგი ხომ 7 წლის განმავლობაში იცავდა მადრიდელთა ღირსებას.
მომავალი დაპირისპირების წინ მორიენტესი გამოტყდა, რომ "სანტიაგო ბერნაბეუზე" დაბრუნება, მით უმეტეს მეტოქის რანგში, მისთვის ძალიან ემოციური მომენტი იქნება. ამასთან, "მორო" აღიარებს, რომ იგი დღემდე გულშემატკივრობს "რეალს", მის უმთავრეს ვარსკვლავად კი, რაული მიაჩნია.
"მომავალ შეხვედრას პატარა ბავშვივით ველი. თითქოს, ეს ჩემი პირველი თამაში იყოს. დარწმუნებული არ ვარ, რომ მოედანზე გასვლის დროს თვალები არ ამიცრემლიანდება. თუმცა, არც მატჩის სპორტულ მხარეს ვივიწყებ - კარგად მესმის, რომ წაგების შემთხვევაში, ჯგუფიდან ჩვენი გასვლის შანსს პრაქტიკულად წითელი ხაზი გადაესმება... დასამალი რა მაქვს - "რეალში" გატარებული კარიერის საუკეთესო 7 სეზონი ჩემში ისე ჩაიბეჭდა, რომ სამუდამოდ ამ კლუბის გულშემატკივრად ვიქეცი. სადაც არ უნდა წავიდე და რა სიტუაციაშიც არ უნდა აღმოვჩნდე, მუდამ მადრიდელთა ქომაგად დავრჩები... "რეალის" ხელმძღვანელობამ გასულ ზაფხულს არაერთი უმაღლესი დონის ფეხბურთელი შეიძინა, მაგრამ ჩემთვის, გუნდის უმთავრეს ვარსკვლავად მაინც რაული რჩება. იგი, გარდა იმისა, რომ უდიდესი პროფესიონალია, საოცარი ადამიანი და უერთგულესი პიროვნებაა. ვთვლი, რომ "რეალს" მისი დარი მოთამაშე არც ადრე ჰყოლია, არც ახლა ჰყავს და არც მომავალში ეყოლება. ამიტომ მას "სამეფო კლუბის" თითოეული ქომაგი უდიდესი პატივისცემით უნდა მოეპყროს", - მომავალი შეხვედრის წინ, მორიენტესის ეს კომენტარი გაზეთ AS-ის ინტერნეტ-ვერსიამ გაავრცელა.
"მორო" "რეალის" შემადგენლობაში 1997-2005 წლებში თამაშობდა და "სამეფოთა" ფორმით ჩატარებულ 182 შეხვედრაში 72 გოლის გატანა მოახერხა. სხვათა შორის, მას ჩემპიონთა ლიგაზე მადრიდელთა წინააღმდეგ თამაშის გამოცდილება უკვე გააჩნია. 2003-2004 წლებში იგი "მონაკოში" იყო განათხოვრებული, როცა ამ კლუბმა ლიგის მეოთხედფინალში, უმეტესწილად მორიენტესის შესანიშნავი თამაშის წყალობით, სწორედ "რეალს" სძლია, შემდეგ "ჩელსიც" ჩამოიშორა და მხოლოდ ფინალში დამარცხდა "პორტუსთან" (0:3).
მიმდინარე ჩემპიონთა ლიგის პირველ ტურში "მარსელმა" საკუთარ "ველოდრომზე" "მილანთან" წააგო (1:2), ხოლო "რეალმა" სტუმრად ტურნირის დებიუტანტ "ციურიხს" სძლია (5:2 |
