ყველა საფეხბურთო სიახლე ერთ საიტზე

დღეს, თბილისის დროით 23 საათსა და 45 წუთზე ჩემპიონთა ლიგის მერვედფინალური ეტაპის ალბათ ყველაზე გამორჩეული მატჩი გაიმართება. მილანში, "სან სიროზე" იტალიური სერია ა-ს ამჟამინდელი ლიდერი "ინტერი" ინგლისური პრემიერ ლიგის ამჟამინდელ ლიდერ "ჩელსის" უმასპინძლებს.

გულშემატკივრები უკვე დეკემბრიდან ემზადებიან ამ მატჩისათვის, მას შემდეგ, რაც შვეიცარიის ქალაქ ნიონში მერვედფინალური ეტაპის კენჭისყრის შედეგები გახდა ცნობილი. ეს მატჩი მხოლოდ იმით არ იქნება საინტერესო, რომ ერთმანეთს ევროპის ორი გიგანტი გრანდი დაუპირისპირდება.

ძირითად ინტერესს მატჩში "ინტერის" მთავარი მწვრთნელის პერსონა იწვევს. ჟოზე მოურინიოს ხელძღვანელობით "ჩელსიმ" ზედიზედ ორჯერ მოიგო ინგლისის უმაღლესი დივიზიონი 2005 და 2006 წლებში. იტალიაში გადაბარგების შემდეგ, პორტუგალიელმა სპეციალისტმა ზუსტად მსგავს წარმატებას მიაღწია ამჯერად უკვე სერია ა-ში, "ნერაძურისთან" ერთად.

მიუხედავად იმისა, რომ ნაციონალურ პირველობაში "ინტერი" შესანიშნავ სეზონს ატარებს, ბოლო წლებია არ უმართლებს ჩემპიონთა ლიგაზე. მიმდინარე სეზონში ჯგუფურ ეტაპში მოურინიოს გუნდი "ბარსელონას", "რუბინსა" და კიევის "დინამოს" დაუპირისპირდა. ჯგუფში მეორე ადგილის დაკავების შემდეგ, გუნდმა მერვედფინალში გააღწია, სადაც "ჩელსის" შეეჩეხა.

"ლურჯებმა" ბევრად უფრო ადვილად გადალახეს ჯგუფური ეტაპი. ლონდონელები შესანიშნავ ფორმაში არიან და ჯერჯერობით ინარჩუნებენ კიდეც ლიდერობას პრემიერ ლიგაში. თუმცა ისიც სათქმელია, რომ გუნდს საკადრო პრობლემები აწუხებს - რამდენიმე საკვანძო ფეხბურთელი ტრამვირებულია, ხოლო ზოგიერთის პირად ცხოვრებაზე უკვე მთელი ბრიტანეთი ლაპარაკობს.

კარლო ანჩელოტი იმედოვნებს, რომ მისი გუნდი კონცენტრაციას მოახერხებს და გასვლით მატჩს მილანში მოიგებს. "ლურჯების" თავკაცი შესანიშნავად იცნობს "ინტერს", რადგან იტალიელი სპეციალისტი წლების განმავლობაში წვრთნიდა "მილანს", რომელიც მოგეხსენებათ, "ინტერის" მოსისხლე მტერია.

გასულ უიქენდზე მცირე ავტოავარიაში მოყვა მასპინძელთა მეკარე ჟულიო სეზარი. მას სერიოზული დაზიანებები არ მიუღია, ამიტომ დღევანდელ შეხვედრაში კარს კვლავ ჟულიო სეზარი დაიცავს. ტრამვირებულები არიან კრისტიან კივუ და დავიდე სანტონი, რის გამოც მარცხენა ფლანგზე პირველივე წუთებიდან ხავიერ ძანეტი ითამაშებს.

ნახევარდაცვაში შესაძლოა ვიხილოთ დეიან სტანკოვიჩი, სალი მუნტარი და მაკდონალდ მარინგა, რომლის გადაბირებაც ზამთრის სატრანსფერო ფანჯრის დროს "სიტიმ" ვერ მოახერხა და საბოლოოდ ფეხბურთელი "პარმადან" "ინტერში" გადავიდა. თავდასხმის ხაზში ერთმანეთს სამუელ ეტო'ო და დიეგო მილიტო შეუწყვილდებიან. თავდამსხმელმა მარიო ბალოტელიმ ახლახანს მოიშუშა ზურგის ტრამვა და ადგილს სათადარიგოთა სკამზე დაიკავებს.

ანჩელოტის სერიოზულად მოუწევს თავის მტვრევა მარცხენა მცველის საკითხის პოზიციაზე. საქმე იმაშია, რომ ძირითადი მარცხენა მცველი ეშლი კოული დიდი ხნით დაიმტვრა. ასევე ტრამვირებულია მისი შემცვლელი იური ჟირკოვი, რომელმაც პრემიერ ლიგის ბოლო ტურში "ვულვზის" წინააღმდეგ ტრამვა მიიღო. მარცხენა ფლანგზე თამაში შეეძლო პაულო ფერეირას, მაგრამ ის ჩემპიონთა ლიგის განაცხადში არ იქნა შეყვანილი.

მცირე ტრამვები მოიშუშეს ალექსმა და ჯულიანო ბელეტიმ. ნახევარმცველი ფრენკ ლამპარდიც, რომელმაც განაცხადა, რომ ერთ დროს სერიოზულად იყო დაფიქრებული "ინტერში" გადასვლაზე, გამოჯანმრთელდა და დღეს თამაშს შეძლებს. ლაზარეთში იმყოფებიან ჟოზე ბოსინგვა, მაიკლ ესიენი და დეკუ.