ყველა საფეხბურთო სიახლე ერთ საიტზე

ალბათ, ქართული ფეხბურთი ბედნიერია, ბრაზილიაში გოჩა ალადაშვილისნაირი ქომაგი რომ ჰყავს. ატლეტიკო პარანაენსეს საერთაშორისო განყოფილების ხელმძღვანელი სულ იმის მცდელობაშია, ქართულ ფეხბურთს რამენაირად დაეხმაროს. ჩვენი ინტერვიუდან მის ახალ პროექტებს გაეცნობით.

- ბატონო გოჩა, როგორც შევიტყვეთ, 17-წლამდელთა ნაკრებს ბრაზილიაში სამი საკონტროლო შეხვედრის გამართვაში ეხმარებით...

- ატლეტიკო პარანაენსეს დირექტორატის წევრებს უკვე ველაპარაკე და გადაწყვეტილი ამბავია: 17-წლამდელებს 5 მარტიდან ბრაზილიაში ელოდებიან. კობა ჟორჟიკაშვილი და გოჩა ავსაჯანიშვილი გუნდს მომავალი შესარჩევი ციკლისთვის მოამზადებენ და მსურდა, რამენაირად დავხმარებოდი. დაგეგმილია სამი საკონტროლო შეხვედრა - ატლეტიკო პარანაენსეს, პარანასა და კურიტიბას ჭაბუკთა გუნდებთან. ეს იქნება მშვენიერი შეკრებაც და საჭირო საკონტროლო შეხვედრებიც, სადაც ჩვენი ბავშვები, დარწმუნებული ვარ, ბევრს ისწავლიან.

- ოლიმპი სეზონის მეორე ეტაპისთვის მზადებას ამთავრებს, აკინო და ფრაგა კი დღემდე არ ჩამოსულან...

- აკინო და ფრაგა ჩამოვლენ. სამწუხაროდ, მგზავრობაში გარკვეული პრობლემა შეექმნათ, მაგრამ ესეც მოგვარდა.

- ბრაზილიიდან ფეხბურთელების ახალი დესანტის გადმოსხმაზე იყო ლაპარაკი, მაგრამ ჯერ კონკრეტული არაფერი ისმის. ეს ხომ არ ნიშნავს იმას, რომ ოლიმპი სეზონს მხოლოდ ორი სამხრეთამერიკელით გააგრძელებს?

- დავით კირკიტაძის ხელმძღვანელობით, ჩვენი დელეგაცია ბრაზილიაში 1-ელ თებერვალს მიემგზავრება. ისინი სასურველი ამპლუის ფეხბურთელებს ადგილზე შეარჩევენ.

- თუმცა, როგორც ჩანს, მოთამაშეებს ასე მასობრივად აღარ ჩამოიყვანთ, როგორც ეს სეზონის დასაწყისში მოხდა - ჩემპიონობისთვის მებრძოლი კლუბი რამდენიმე მოთამაშეს პირველობის მსვლელობისას ვერ დაიმატებს.

- ეს კლუბის გადასაწყვეტია, ერთ კაცს დაიმატებს, ორს თუ სამს.

- როგორც ვიცით, თქვენ მიერ რუსთავის ოლიმპში განხორციელებული პროექტებით ბელარუსები დაინტერესდნენ და ანალოგიურის გაკეთება მინსკის დინამოშიც შემოგთავაზეს...

- დიახ, ასეა. მე და გია ფირცხალავა მინსკში იქაური დინამოს ხელმძღვანელთა მიწვევით გახლდით. ბელარუსებმა ასეთივე პროექტის განხორციელების სურვილი გამოხატეს. მე კი იმიტომ მიმიწვიეს, რომ ატლეტიკო პარანაენსემ აღმოსავლეთ ევროპაში წარმომადგენლის სტატუსი მომანიჭა. ადრე მათ ინტერესებს მხოლოდ საქართველოში წამოვადგენდი, მაგრამ ოლიმპში საკმაოდ საინტერესო თანამშრომლობის შემდეგ, სხვა დავალებებიც მომცეს. მინსკის დინამოს ბრწყინვალე სტრუქტურა აქვს, ძალიან კარგად მიგვიღეს და თანამშრომლობისთვის მზად არიან.

- მინსკის დინამოშიც იგივე როლი დაგეკისრებათ, რაც ოლიმში?

- ამას მომავალი გვიჩვენებს. ძირითადად, საქართველოში ვიქნები, ბელარუსში კი თვეში ერთხელ ჩავალ.

- კიდევ ხომ არ გაქვთ რაიმე ჩანაფიქრი?

- როცა 17-წლამდელები ბრაზილიაში გაემგზავრებიან, დელეგაციაში საქართველოს ფეხბურთის ფედერაციის პრეზიდენტი ზვიად სიჭინავა და ვიცე-პრეზიდენტები - ალექსანდრე ჩივაძე და გია ფირცხალავა (დღეს უკვე პროფლიგის პრეზიდენტი) იქნებიან.

- ისინი ატლეტიკო პარანაენსეს ხელმძღვანელობას შეხვდებიან?

- ...არა მხოლოდ. ბრაზილიელებს უკვე ველაპარაკე და სიჭინავასა და მათი საფეხბურთო კონფედერაციის პრეზიდენტ რიკარდუ ტეიშეირასთან შეხვედრას ამზადებენ. ვიზიტი ორი დღით იგეგმება და ვფიქრობ, ქართული ფეხბურთისთვის ეს ძალზე სასარგებლო და მნიშვნელოვანი შეხვედრა იქნება. კურიტიბიდან რიო დე ჟანეირომდე თვითმფრინავით საათ-ნახევარი დაგვჭირდება და ატლეტიკო პარანენსეს თავკაცებთან შეხვედრის შემდეგ ჩვენი ფედერაციის წარმომადგენლები ტეიშეირასაც ესტუმრებიან.

- ასეთი შეხვედრებისთვის თემებს წინასწარ ამზადებენ და იქნებ, მკითხველსაც გავაცნოთ...

- ჩვენი სურვილია, საქართველოს ფეხბურთის ფედერაციასა და ბრაზილიის კონფედერაციას შორის საქმიანი და მეგობრული კავშირები დამყარდეს, რაც მომავალში აუცილებლად გაღრმავდება. თანამშრომლობა კი სხვადასხვა მიმართულებით შეიძლება - მათი ცოდნა-გამოცდილების გაზიარება ნამდვილად არ გვაწყენდა.