ყველა საფეხბურთო სიახლე ერთ საიტზე

ჯონ ტერი ინგლისის ნაკრების კაპიტნობიდან გადადგა! ეს ამბავი მისი და ფაბიო კაპელოს 12-წუთიანი შეხვედრის შემდეგ გახდა ცნობილი. შეგახსენებთ, რომ 29 წლის ვარსკვლავი სკანდალში გაეხვა: ქვეყანას მოედო, რომ უეინ ბრიჯის (მისი თანაგუნდელი ეროვნულ ნაკრებში) სატრფოსთან მას ფარული რომანი ჰქონდა, რამაც ინგლისური საზოგადოების დიდი ნაწილი აღაშფოთა და ტერიმაც ზეწოლას ვეღარ გაუძლო.

დიდი ხნის ფიქრის შემდეგ გადავწყვიტე, რომ ჯონ ტერისთვის ნაკრების კაპიტნობა ჩამომერთმია, - განაცხადა იტალიელმა მწვრთნელმა. კაპელომ ჟურნალისტებს უთხრა, რომ 2008 წელს, როცა ის ჩელსის ლიდერს ნაკრების კაპიტნად ნიშნავდა, ფეხბურთელი მის ყველა მოთხოვნას აკმაყოფილებდა, მაგრამ დღეს, როცა მის საქციელს ბრიტანულ მასმედიაში დიდი სკანდალი და ხმაურიანი სათაურები მოჰყვა, კაპელომ მიიჩნია, რომ გამოსავალი სწორედ ტერის გათავისუფლება იქნებოდა.

ჯონ ტერიმ, როგორც კაპიტანმა, ინგლისის ნაკრებისთვის ძალიან ბევრი სასარგებლო რამ გააკეთა და მასზე კარგის მეტი არაფერი მეთქმის, მაგრამ არსებობს მეორე რეალობაც და იძულებული ვარ, მას ანგარიში გავუწიო. ჩემი, როგორც მწვრთნელის ამოცანაა, მივიღო ისეთი გადაწყვეტილება, რომელიც სასარგებლო იქნება გუნდისთვის. შესაბამისად, ჩემი დღევანდელი გადაწყვეტილებაც სწორედ ინგლისის ეროვნული ნაკრების ინტერესებითაა ნაკარნახევი. როცა ჯონ ტერი კაპიტნად დავნიშნე, დავასახელე ვიცე-კაპიტანი და მესამე ადამიანიც, რომელიც საჭიროების შემთხვევაში ვიცე-კაპიტანსაც შეცვლიდა. რასაკვირველია, ამ გადაწყვეტილებას არ შევცვლი. მინდა, დიდი მადლობა გადავუხადო ინგლისის საფეხბურთო ასოციაციის თავმჯდომარე ლორდ დევიდ ტრისმენსა და მის მარჯვენა ხელს, იან უოტმორს. მათ საშუალება მომცეს, ნაკრების ინტერესებიდან გამომდინარე გადაწყვეტილება ერთპიროვნულად მიმეღო.

ამრიგად, ინგლისელთა ახალი კაპიტნის ვინაობაც გარკვეულია - რიო ფერდინანდი მანჩესტერ იუნაიტედიდან...