 უეფას პრეზიდენტი მიშელ პლატინი საქართველოს აპრილში ეწვევა. პლატინამდე კი უეფას პროგრამების ხელმძღვანელი პასკალ ტორესი ჩამობრძანდება. მას იმ ობიექტების ნახვა აინტერესებს, რომლებიც უეფას პროგრამებით უნდა განხორციელებულიყო. კერძოდ, რუსთავის სტადიონი ოლიმპი, ვიტ ჯორჯიას სტადიონი მცხეთაში, საწვრთნელ-ტექნიკური ცენტრი ბასა და საგურამოს ბაზა. ტორესი თბილისში 10 თებერვალს საღამოს ჩამოვა, 11-ში ზემოთ ჩამოთვლილ ოთხივე ობიექტს მოინახულებს და 12 თებერვალს საქართველოდან გაემგზავრება. ჩვენი ფედერაციის თავკაცობამ უეფას ექსტრადახმარება სთხოვა, მაგრამ ამ საკითხის გადაწყვეტამდე საკვანძო თემაა, თუ რამდენად განხორციელდა უეფას მიერ დაფინანსებული პროგრამები საქართველოში. სამწუხაროდ, ამ ოთხი ობიექტიდან არც ერთი არ დასრულებულა და სიჭინავა სწორედ ამაზე წუხს. სამწუხაროდ, გარკვეულ მიზეზთა გამო ამ ოთხი ობიექტიდან არც ერთი არ არის დასრულებული. რუსთავის სტადიონის ფოლადზე მატჩები კი იმართება, მაგრამ ობიექტი მაშინ ჩაითვლება დასრულებულად, როცა ყველა ნორმის გათვალისწინებით, ოფიციალური აქტით ჩაბარდება. რაც შეეხება მცხეთის სტადიონს, საფეხბურთო კლუბ ვიტ ჯორჯიასა და უეფას შორის ფედერაცია იყო შუამავალი. ჩვენი მისია იყო ხელოვნურსაფრიანი მოედნის ჩამოტანა, რაც გაკეთებულია კიდეც. ეს ობიექტი აქამდეც უნდა დასრულებულიყო, მაგრამ... მინსკის კონგრესზე უეფას ჩინოსნები საქმის კურსში ჩავაყენეთ, რომ ეს ობიექტები დასრულებული არაა. თუმცა, უეფას სურვილია, მისმა წარმომადგენელმა საკუთარი თვალით ნახოს თუ რა გაკეთდა, რომელი ობიექტი რა სტადიაშია და სწორედ ამიტომ ჩამოდის პასკალ ტორესი საქართველოში. აქედან გამგზავრების შემდეგ, ის უეფას პრეზიდენტ მიშელ პლატინისა და სხვა ხელმძღვანელებს საქართველოში ვიზიტზე მოუთხრობს... უეფას ჩინოსნებმა მინსკში დამაიმედეს - პლატინის ჩამოსვლით არაერთი მნიშვნელოვანი საკითხის გადაწყვეტის შანსი გიჩნდებათო - განაცხადა ზვიად სიჭინავამ. |
