ყველა საფეხბურთო სიახლე ერთ საიტზე

ეროვნული ნაკრების მცველი უჩა ლობჟანიძე ანთალიაში მოსამზადებელ შეკრებაზე მყოფ დნიპროს შეუერთდა. გუშინ კი უჩამ დნეპროპეტროვსკელთა გუნდში პირველად ითამაშა. ვლადიმირ ბესონოვის გუნდმა რუმინულ უნირეასთან ამხანაგური მატჩი გამართა და 0:2 დამარცხდა. უკრაინელთა რიგებში ჩვენებურთაგან მხოლოდ ლობჟანიძემ ითამაშა. ნახევარმცველი ჯაბა კანკავა არც შეცვლაზე შესულა. რაც შეეხება უჩას, ნაკრების მცველი ბესონოვმა სასტარტო შემადგენლობაში გაამწესა და პირველი ტაიმის შემდეგ ვიტალი დენისოვით შეცვალა.

საინტერესოა, თუ როგორ გაისარჯა ლობჟანიძე. 45 წუთის განმავლობაში უჩამ 35-ე წუთზე ყვითელი ბარათი დაიმსახურა. მოედანზე მისი ყოფნისას, რუმინელებმა ანგარიში გახსნეს. სამწუხაროდ, ამაში ქართველი მცველის წვლილიცაა. დნიპროს ოფიციალური ვებგვერდის ცნობით, მარჯვენა მცველი უჩა ლობჟანიძე, ერთ ეპიზოდს თუ არ ჩავთვლით, კარგ დონეზე წარმოჩნდა. 35-ე წუთზე ლობჟანიძემ რუმინელთა ფორვარდი ბილაშკო დაბლოკა, რისთვისაც პენალტი აიკიდა. თერთმეტმეტრიანი კი თავად დაზარალებულმა შეასრულა და გოლადაც აქცია.

დაბოლოს, რაოდენ გასაოცარიც არ უნდა იყოს, დნიპროს ოფიციალური საიტი ჯერჯერობით მხოლოდ იმას იტყობინება, რომ ლობჟანიძე გუნდს ანთალიაში შეუერთდა. უნირეასთან მატჩის ანოტაციაში კი ჩვენებური მცველი მოხსენიებულია პოტენციურ ახალწვეულად, რომელიც ამ საკონტროლო შეხვედრაში საქმეში ნახეს...